ماساة جديدة تعيشها قرية المنشاة الكبرى بعد اختطاف 10 من ابنائها على يد عصابات مسلحة في ليبيا قالت نادية كامل خليفة ام حامد عبد الكريم حامد عبد المولى وهي مكلومة: قالولي ان ابني اتخطف من 34 يوم دي اول مرة يسافر ليبيا في شهر 11 اللي فات قعد في الجيش سنتين و 3 شهور وخلص من سنة ونصف ووسط دموع غزيرة أضافت نادية : أنا ست موجوعة محدش اتوجع وجعتي ابني حامد يتيم سافر علشان يصرف عليا انا واخته ابوهم مات ومسبلناش حاجة، سابلي 3 ولاد وبنت ابني الكبير محمد سافر الكويت ومات هناك في حادث رجع ميت كان عنده 25 سنة علشان كده لما قالولي ان حامد ابني اتخطف انهرت علشان انا ست موجوعه ومليش غيره هو وأخته كفاية اخوه مات مقدرش التاني يضيع مني. وتواصل البكاء وتنظر إلى السماء والدموع تذرف من عينيها وتقول : وحشتني يا حامد ربنا يرجعك بالسلامة يا ابني كلمني قبل ما يختطف ومن يومها مكلمتوش تاني ومعرفش عنه حاجة ومحدش بيقولي عنه اي كلام ، ابني وحشنى قوي وخايفة عليه. وقالت في رسالة وجهتها للرئيس السيسي ربنا معاك يا ريس ونفسك معانا بس عايزاه يجيب لي ابني ربنا معاك ومعانا يا ريس اللي خطفوا ابني حطموني ودمروني ابني رايح ياكل لقمة عيش معنديش غيروا بيصرف عليا أنا واخته في البيت معندناش حاجة ومنقدرش ندفع فلوس نطلعه انا ست أرملة معنديش حاحة عايشة بـ 300 جنيه معاش الضمان الاجتماعي وانتم عارفين المصاريف والبيوت والعيشة غالية.
سحر فاروق الحمدانى
ليست هناك تعليقات:
إرسال تعليق