السلام عليكم ورحمة الله وبركاته ,,
يوم الاثنين اللى فات اللى هوة من يومين .. اختى راحت تصلى التراويح فى جامع خشبة الدور اللى فوق ,,, وكانت جاية من مشوار فشنطتها كان فيها موبايل وتابليت ونظارة شمسة ماركة ومحفظة وفلوس وبطاقة وكارنيهات و2 فيزا وكل المفاتيح (يعنى الشنطة كان فيها حاجات بثمن اكتر من 10 آلاف جنيه تقريبا) .
وهية بتصلى كانت حاطاها جنبها ,, قبل ما تسجد فى أول ركعتين فى التراويح كانت شايفة الشنطة جنبها , وبعدين لما سجدت مطمنتش ان الشنطة جنبها وقالت هتحطها قدامها أحسن ,وسلمت ملقيتش الشنطة جنبها.... سالت الناس الموجودة ... بنت صغيرة قالتلها واحدة دخلت وكان معاها كيس ومسكت شنطة وجريت وقفلت باب الجامع وراها ... اختى اخدت شارع الجمهورية كله تدور على واحدة بتجرى معاها شنطة بمبى كبيرة (شنطة اختى) ملقتش حاجة وكانت حاسة انها بتحلم .... وطبعا الصدمة فى الأول بتبقى وحشة أوى لأى حد ... طبعا الحمد لله قضاء أخف من قضاء ... بس ان حد ياخد حاجتك غصبا عنك احساس مش حلو خاالص ..... طبعا بغض النظر ان الحرامية ديه مراعتش رمضان ولا بيت ربنا ولا سجود ولا خافت من حاجة ... مش عارفة ازاى هيه مش خايفة من عقاب ربنا ليها وللى بتحبهم فى الدنيا وفى الآخرة ...
المهم عملنا محضر وقفلنا الفيزا وقبل ما نوقف الخط حصلت حاجة غريبة !! فجأة لقيت الخط تانى يوم الصبح بقى متاح !! رنيت عليها فتحت !! بس مش بترد لما بكلمها , قعدت اقولها (( يعنى احنا فى رمضان والتراويح وبيت ربنا , ازاى مش خايفة من ربنا , ده الدنيا كلها ابتلاءات ازاى مش خايفة على نفسك وعلى اللى بتحبيهم لو كان فيه حد بتحبيهم .. وكلام زى كدة ,, وقولتها رجعى الحاجات ونديكى اللى عايزاه بدل ما نبلغ وهديكى فرصة دقيتين فكرى فيهم وانا معاكى على التليفون , وكان جنبى صوت قرآن بالصدفة بتتكلم عن النار , قلتلها سامعة كلام ربنا , سمعت صوت واحدة بتبكى , قلتها خلاص هدى نفسك شكلك محتاجة احكيلى , قفلت فجأة ..... وكلمتها تانى , لغاية ما ردت وقولتهلها اكيد انتى مزنوقة احكيلى , قالتلى انها هتتحبس عشان مديونة ب 5 آلاف جنيه وان جوزها مسافر وان عندها طفلين , وكانت مديونة عشان كانت بتجهز نفسها, وانها حست بالذنب وانها مش بتشتغل عشان عاجزة برجليها وخلاص مش عايزة حاجة وانها مش بتعرف تقرأ وتكتب ومش عارفة ايه الحاجات اللى فى الشنطة وعايزة ترجعها , قولتلها خلاص رجعيها واتصرفلك فى المبلغ أو جزء منه , اختارى المكان أو نتقابل فى مكان عام زى المستشفى وماتخافيش مش هبلغ حد , قالتلى انها خايفة ابلغ حد ووعدتها وحلفت كتير , وبعدين قفلت الخط وسلام كدة))
وجتلنا فكرة اننا نشوف كاميرات المراقبة اللى فى المحل اللى جنب الجامع .... خدوا بالكم كويس من الست اللى ماسكة شنطة بمبى واخدت تاكسى ... وعلى فكرة ماطلعتش عاجزة فى رجلها ولا حاجة , يعنى كانت بتكدب عليا
ياريت اى حد يعرفها أو بيشبه عليها يبلغ عنها .... وعموما الحق لو ما أخدناهوش فى الدنيا هناخده فى الآخرة , وحسابها مع ربنا .. وأكيد ربنا هيعوضنا خير
.... #ياريت تاخدوا بالكم يا جماعة من السرقة اليومين دول #وأى حد عنده معلومة ممكن تفيدنا يبلغنا
فاطمة صلاح
ليست هناك تعليقات:
إرسال تعليق