نظم عدد من طلاب مدرسة المتفوقين، بمحافظة أسيوط، احتجاجا اليوم الخميس، بالساحة الخارجية بالمدرسة، اعتراضًا على نظام التنسيق والقبول بالجامعات الحالى لمدارس المتفوقين، مشددين أنه لا يحقق مبدأ تكافؤ الفرص.
وقال أحد طلاب مدرسة المتفوقين بأسيوط، لـ"اليوم السابع":" نحن معترضين أيضًا على نظام امتحانى الـURT والـInventory"، مشيرًا إلى أن الامتحانين يتسمان بالغموض الشديد، ولم يتم تقديم حل رسمى لهذه المشكلة من قبل وزارة التربية والتعليم.
وأضاف:" نعانى من مشكلة خدمات شبكة الانترنت بالمدرسة، حيث أن خدمة الانترنت المتوفرة حاليا لا تكفي احتياج عدد الطلاب المتواجدين بالمدرسة، مما يؤدى إلى قطع الانترنت في أغلب الأحيان، وهو ما يؤثر سلبًا على سير العملية التعليمية، ونطالب باستبداله بانترنت أعلى كفاءة".
وأوضح أن الطلاب معتصمين داخل أسوار المدرسة لحين البت فى مطالبهم وتنفيذها أو وصول رد حاسم من وزارة التربية والتعليم، مؤكدًا أن اعتصامهم صامتًا دون هتافات احترامًا لحرم المدرسة، ولعدم تعطيل الطلاب الذين لايرغبون في المشاركة في الاعتصام واستكمال يومهم الدراسى.
ريهام عبد الله
----------------------------------------------
ابوست طويل شوية بس مهم لطلبة ستيم يعني و بذات مدرستي ....
مبدئيا هوضح سبب الاعتصامات في الوقت دا و ايه السبب و قد ايه السبب دا محوري و بيمثل فعلا تحديات بتوجهها البلد كلها بشكل عام
هسأل سؤال : بعد ثلاث سنين من التعلم و البحث و المشاريع و المسابقات و الطريقة الممتازة في التعلم دي و الخبرة الكبيرة جدا جدا اللي بنكتسبها من الجو العام في المدرسة
الدولة بتستفيد مننا ازاي و مستقبلنا بيبقى عامل ازاي ؟؟!
من وجهة نظري المتواضعة و بعد سنة من الهري و الحوارات و الاجتماعات مع المسؤلين لما كنت في اتحاد الطلبة
أن مفيش إجابة واضحة للسؤال و مفيش خطة ممنهجة و الكلام عايم و الموضوع عشوائي للرؤية بعيدة المدى
يعني ايه ....
يعني انا كدولة بعمل مشروع قومي عشان أوفر كوادر و اطور التعليم و اهتم بالمتفوقين لمجرد اني اقول اني كدولة بعمل إنجاز و بشتغل و معالي فخامة سيادة الباشا الدكتور(اي كان المسؤل) شغال ولا عشان افيد البلد فعلا .....!
دا باين في مرحلة مهمة زي التنسيق
التنسيق بتاعتنا القرار بتاعه عايم و مفيش حاجة محددة تتضمن للشخص انو يطلع يشتغل و يطور و يبدع في المجال اللي هو حابه و متميز فيه
و مرحلة التنسيق متأخرة و مفيش و كل الجهات بالبلدي بترمينا للتانية عشان العشوائية دي
و بالتالي الأغلب بيتجه انو يتعلم برا مصر و بيتشحطط فعلا بس هل كل دا مشجع ليك كطالب و انت داخل على مجهول لأهم حاجة بالنسبالك و هي مستقبلك
لذلك اتجهنا للاعتصام عشان دا الحل الأخير بالنسبة لينا
لأن اللي بيحصل دا تهريج و إهدار للمال العام و فشل تام من القائمين على المشروع رغم انهم بيحاولو
و بتكلم كدا بناء على اني كنت امين اتحاد الطلبة في مدرستي و عملنا كذا اجتماع مع وحدة ستيم و ياما كتبنا مذكرات للوزير و نائب الوزير و التعليم العالي و مجلس الوزراء و مجلس الشعب و مبخدتش غير أن الشو الإعلامي و الفرحة بانجزتنا الحالية كطلاب و بيهملوا أهم حاجة و هي مستقبلنا و لما تكلم حد يقولك "أن شاء الله" و مفيش قرارات متفعلة و وصلنا للوزير نفسو و رئيس الوزراء و بردو مع ان دا قرار مش مكلف يعني لكن طبعا الروتين و العشوائية موقفه الحال كالعادة
إذا كان بتعملوا في مستقبلنا كدا ف مستقبل المستقبل بيضيع
#هنعتصم_عشان_حقنا
احمد توفيق
ليست هناك تعليقات:
إرسال تعليق