السبت، 21 مايو 2016

الصور طبيب يعلن عن نجاحه فى عملية " الحول الرأسى " لطالبة من محافظة اسيوط


حالة هذا الاسبوع ( 80 ) هناء .. 19 سنة من الصعيد
طالبة في كلية آداب اسيوط
" الحول الرأسي "
الحول ده من اصعب انواع الحول لسببين ..
اولاً تشخيص العضلات المسئولة عن الحول ده صعب جداً ومحتاج اجهزة معينة وفحص دقيق لأن بيخش في تشخيصه 4 عضلات مختلفة وكتير من الدكاترة بيتلخبطوا فيهم وساعتها بتكون النتيجة كارثية ..
ثانياً عمليات اصلاح الحول الرأسي من اصعب عمليات الحول .. ازاي عين مرفوعة بالمنظر ده نقدر ننزلها لتحت بأجزاء من الملليمتر من غير مشاكل .. ازاي مثلاً الجفن العلوي نحافظ على مكانه من غير ما ينزل مننا لتحت .. ازاي مثلاً ننزل العين لنفس المستوى الافقي بتاع العين التانية بالظبط .. لو فرقت نص مللم هتبقى برضه عين أعلى أو أوطى من التانية.. زي ماقلت لكم .. لو فيه خطأ في التشخيص أو في العملية بتبقى فعلاً النتيجة وحشة قوي
هناء بنت صعيدية دمها زي السكر .. من النوع اللي تحس انك تعرفه قبل كده
هناء عندها حول رأسي جامد قوي .. الحول الرأسي بيخلي شكل العيان وحش قوي .. هناء من زمان الدكاترة خوفوها .. قالوا لها الحول ده نادر جداً .. والعملية لو ما اتعملتش صح .. الدنيا بتبوظ خالص .. والجفن العلوي هيسقط لتحت .. وهتتمنى انك مكنتيش عملتي العملية أصلاً ..
المهم .. قمت كشفت على هناء .. عملت لها رسم عضلات .. فحص كده بنعمله بالكمبيوتر .. حددت العضلات المسئولة عن ارتفاع العين لفوق .. حددت زاوية ارتفاعها .. وحددت العملية اللي المفروض نعملها عشان ننزل العين لتحت .. هناء وانا بكشف عليها كانت خايفة جداً .. وانا كررت عليها كذا مرة " متخافشيش يا بنتي مش هيحصل لك أي ضرر من العملية .. ان شاء الله شكلك هيتحسن والجفن مش هيسقط ولا حاجة وهتبقي زي الفل .. رسم العضلات شخص حالتك بالظبط .. وحدد مشكلتك فين " ..
اتفقنا نعمل العملية تاني يوم .. يا مسهل يارب
العملية اخدت ييجي ساعة كده .. عملتها ببنج موضعي .. هناء هي اللي طلبت كده .. قالت لي متخافشي يا دكتور جمال .. هأكون هادية جداً .. مش هأتعبك أبداً .. انا بنت بسبع رجالة .. المهم هناء وانا بأعمل العملية كانت فعلاً هادية جدا جدا .. عملت لها العملية من غير أي تعب .. الحمد لله
هناء جت لي النهاردة عشان اطمن عليها بعد اسبوعين من العملية.. الحمد لله .. هايلة والله .. نتيجة رائعة .. مفيش غلطة .. يستاهل الحمد .. قلت لها عمليتك حلوة قوي .. عايز انزلها في حالة هذا الاسبوع .. قالت لي بس تعمل كروب للصورة عشان وشي ما يبانش ومحدش يعرفني .. احترمت رغبتها طبعا .. مع اني كان نفسي انزل الصورة كاملة لأنها في الحقيقة بعد العملية بقت زي القمر .. وصورتها كانت هتسمع في الصفحة عندي .. ولايكات وكده
حمد الله على سلامتك يا بنتي
والف مبروك
د. جمـال صبحي

بالصور طبيب يعلن عن نجاحه فى عملية " الحول الوحشي المتقطع " لطفل من محافظة اسيوط  

ليست هناك تعليقات:

إرسال تعليق

البقاء لله .. وفاة مواطن واصابة عمه بطلقات نارية من ضابط بقرية الزاوية باسيوط وغضب الأهالى من ظلم الداخلية فى اسيوط

المواطن حسن مش إرهابى لكنه إنسان  كل جريمته انه مواطن غلبان خاف من حضرته فجرى راح ضربه بالنار ----------------------------------...