السبت، 12 نوفمبر 2016

صحافة المواطن ’’ قصه الشهيدة نهى .. التى هزت المجتمع الاسيوطى ’’ مستشفى الرحاب باسيوط تقرر زيادة مرتب الشهيدة نهى والمرتب يفضل شغال مدى الحياه للاطفال اليتامى .. واهالى يتبرعون بـ 70 الف جنيه لدفع الاقساط والديون وإبراء ذمتها وعمل شهادات للاطفال اليتامى والايراد يذهب مع المرتب .. والمحافظ الملعون الكذاب ياسر الدسوقى محافظ اسيوط يرفض الاعتراف بها على الشاشات .. ربنا يرحمها ويجعل مثواها الجنه


حدوته مصريه واقعيه...اقرؤوها ﻻخرها...علشان تعرفوا ان مصر بلدنا وحشه قوى وممكن تبقى حلوه قوى
نهى ..بنت من الشعب المطحون ..اتجوزت وهيا وصغيره خلفت 4 عيال...جواز مش موفق ...اتطلقت وجوزها اختفى ورمى العيال..عاشت مع ابوها فى شقته...عايزه تاكل عيالها...اشتغلت فى مستشفى الرحاب 1 ..فترتين من8ص لحد 4م..وتروح ساعتين تغدى عيالها..وترجع تشتغل تانى من 6م حتى 12م...واﻻمورماشيه
من 5 شهورلقيت شاب غلبان رضى بظروفها واتجوزها...علشان تجهز بيت جابت كل حاجه قسط وغالى علشان مش معاها مقدم واتجوزت فى اجازه عيد اﻻضحى وحملت مباشره
يوم السيول فى اسيوط خلصت شغلها وهيا مروحه المطر اشتغل وبنتها فالشارع ...نزلت جرى تدور على بنتها  وامها واختها...رجلها نزلت فى شوية ميه جنب عمود مكشوف اتكهربت وماتت ومات معاها جنينها فى بطنها معاها قدام امها واختها وهيا ﻻبسه يونيفورم الشغل
مصر وحشه قوى...لانها ماتت هيا وجنينها وعيالها بقوا يتامى علشان فساد محليات واهمال شركة كهربا رؤسائها بياخدوا ملايين مكافآت....والمحافظه دفعت ﻻهلها 5 اﻻف جنيه...والشئون الاجتماعيه 3 الاف جنيه...يعنى هيا وجنينها ب8 اﻻف جنيه...الروح فيكى يامصر ب4 اﻻف جنيه
مصرممكن تبقى حلوه قوى ليه؟...لقيت كل الناس عندى فالمستشفى عايلين هم اﻻطفال اليتامى وعايزين يعملوا حاجه...واكتر ناس العمال وصغار الموظفين...وحسينا ان دى واحده مننا وعيالها عيالنا...
قررنا ان مرتبها يزيد ويروح لعيالها مدى الحياه من الرحاب واى زياده فى المرتبات تتطبق عليها طول ماحنا عايشين
دايهاب عبد الراضى كلينيكال باثولوجى ومدام غاده عكاشه..عملوا حملة جمع تبرعات ...الحمد لله من اول اسبوع جمعوا 30 الف جنيه سددوا كل اقساطها...وابراوا ذمتها...وكمان دلوقتى كملوا 40 الف جنيه حنعمل بيهم شهادات للعيال وايرادهم يروح مع المرتب
ربنا يرحم نهى...شكرا لكل واحد دفع قرش...شكرا د ايهاب...شكرا مدام غاده

حمدى الغنيمى

هناك 6 تعليقات:

  1. شكرا جزيلا الى رئيس مجلس اداره مستشفيات الرحاب باسيوط أ.د/حمدى الغنيمى

    ردحذف
  2. الحمد لله ان لسه فى ناس محترمه كده فى بلدنا وربنا يرحمك يا ستى ويرحمنا احنا اللى لسه عايشين ومش عارفين مصيرنا ايه .الف حمد وشكر ليك يا رب استرنا من عندك

    ردحذف
  3. والله لو فى بلد محترمة كان يتحاكم مسئولى الكهرباء والمحليات.. الله الله يرحمها ويجعل مثواها الجنة

    ردحذف
  4. جزاء الله كل خير لكل من ساهم فى التبرع وربنا يجعل مصر الاحسن ويجزى الظالمين المقصرين

    ردحذف
  5. أعتقد أن ده أعلان للمستشفي اللي يعمل خير ما يقولش

    ردحذف
  6. أن لله وأن إليه راجعون المسئول عن احنا شعب يسكت عن الاهمال وزاره الكهرباء فين من التعويضات والمسئولية أن كل موظف مش بيشوف شغله كما ينبغي لكن الموظف والمهندس لو يعرف أن شخص هيموت وأنه سبب فى موته علشان الضمير فى الشغل

    ردحذف

البقاء لله .. وفاة مواطن واصابة عمه بطلقات نارية من ضابط بقرية الزاوية باسيوط وغضب الأهالى من ظلم الداخلية فى اسيوط

المواطن حسن مش إرهابى لكنه إنسان  كل جريمته انه مواطن غلبان خاف من حضرته فجرى راح ضربه بالنار ----------------------------------...